 |
| عبداللطيف : إعادة هيكلة المرحلة الثانوية لاتاحة محتوى تعليمي جيد للطلاب |
وزير التعليم : هيكلة الثانوية العامة تمت وفق دراسة لـ 120 خبيرا وقياس تجارب 20 دولة
ناقشَ محمد عبد اللطيف ، وزير التربية والتعليم والتعليم الفني ، تفاصيل اليوم الدراسي وكيفية توفير الوقت المناسب لشرح المناهج ؛ حتى يتم استيفاء كل مادة حقها في الوقت المطلوب لها.
جاء ذلك خلال لقاء وزير التربية والتعليم والتعليم الفني ، رؤساء تحرير الصحف والمواقع الإلكترونية، اليوم الثلاثاء.
وقال الوزير : عندنا الأسبوع فيه 5 أيام دراسية ، واليوم فيه من 7 إلى 8 حصص ؛ يعني بنتكلم عن 35 حصة في الأسبوع، وعندنا 14 مادة ؛ المفروض نقسمها على الـ35 حصة ، طبعًا الرقم ده صعب جدًّا ، لما بنيجي نقسِّم نلاقي المواد الأساسية ؛ زي الفيزياء والرياضيات ، عدد الحصص فيها قليل جدًّا .. الفيزياء بيدي حصتين في الأسبوع ، يعني 23 أسبوعًا في السنة ، بنضرب الحصتَين في 35 حصة في 23 أسبوعًا ، مبنعملش 40 ساعة في السنة ، والمنهج مُصمَّم على إننا محتاجين من 100 إلى 120 ساعة في السنة ، فالطالب بيدخل في أول يوم في الدراسة ، المدرس بيقول للطالب عندنا منهج الفيزياء ، مش هنعرف نخلص المنهج جوه المدرسة ، إيه السبيل بتاعه ؟ إنه هو يتحرك في الدروس ، مالهاش حل ، ومش غلطة المُدرس.
وأضاف عبد اللطيف : نحتاج من ولادنا ، وأهم حاجة نعملها ، إنه يبقى عندهم مهارات ؛ المهارات تعلم من طرق التدريس ، عايز أعلم قيادة ، وأي مهارة موجودة بتتم من طرق التدريس ، أدخله معملاً .. على فكرة فيه معامل كويسة جدًّا في المدارس الثانوي ، والأنابيب ما دخلش فيها مياه ، هل غلطة المدرس إن الولاد مش بتدخل المعامل؟ مش غلطة المدرس ، هو عنده حصتان ، هيخلص محتوى ولًّا يدور على مهارات؟! ،ونوه الوزير بأن تعليم المهارات أصبحت فيه أزمة ومشكلة بسبب الوقت.
وتابع عبد اللطيف : لما جينا نبُص في إعادة هيكلة الثانوية ، عملنا إيه؟ عندنا المركز القومي للبحوث ، فيه 120 دكتورًا وباحثًا من كلية تربية ، قُلنا لهم عايزين دراسة على أهم 20 دولة في العالم في التعليم ، فوجدنا أن أقصى دولة بتدرس من 6 إلى 8 مواد في السنة.
واستطرد الوزير : " بصينا على أنظمة التعليم الناجحة في مصر زي الآي جي ، والبريطاني في مصر ، الولاد بيدرسوا 8 مواد في 3 سنين ، والنظام الأفضل منه ، وهو أحسن نظام في العالم دلوقتي ، بيدرسوا 6 مواد في سنتين ، واحنا ولادنا كانوا بيدرسوا 32 مادة في 3 سنين ! ده رقم خيالي ! الوضع ده متساب ليه ؟! هاقول أنا متساب ليه ، طب اتبنى إمتى ؟ وطلع وفضل يكبر من إمتى ؟".
وقال وزير التربية والتعليم : لما جينا نشتغل على إعادة الهيكلة ، لقينا مثلًا مادة الجيولوجيا لا تدرس كمادة إجبارية في أية دولة في العالم ، مصر فقط .. طب إيه تاريخ مادة الجيولوجيا ؟ كانت قبل سنة 1992 فصلًا من الأحياء ، وتم فصلها في سنة 1992 ؛ عشان يبقى لها كتاب خارجي منفصل ودرس منفصل ، و" الفلسفة " لما جينا لها ، قُلنا لأ ، عايزين الفلسفة تُدَرَّس كمادة أساسية موجودة لطلبة العلمي والأدبي ؛ لأنها أم العلوم ، لما جينا ندرس حطيناها في أولى ثانوي ، حصل مشكلة في الفلسفة ؛ عشان الناس عايزاها في ثالثة ثانوي فقط ، لأن درس 3 ثانوي أغلى.
وأضاف عبد اللطيف : " جينا لعلم النفس ، قُلنا هندرسه في سنة واحدة بس ، مش 3 سنين ، وضمينا علم النفس على بعضه ، ويُدَرَّس في ثانية ثانوي ، جينا في الإحصاء في الأدبي ، نسبة كبيرة من طلاب الأدبي بيروحوا تجارة وبزنس ، طب هيشتغل إزاي من غير إحصاء وداتا ؟! حطينا إحصاء في مرحلة ثالثة ثانوي ، فوصلنا إن عندنا 6 مواد أساسية في أولى ثانوي و7 مواد في ثانية ثانوي و5 مواد في ثالثة ثانوي ، وعملنا الهيكلة بشكل إن احنا نقدر نخلص المواد الأساسية في المدرسة ".
اكتب تعليقك اذا كان لديك اى تسائل عن الموضوع ، وسنجيبك فور مشاهدة تعليقك